martes, 14 de mayo de 2019

#hemeroteka #lgtbifobia | Homofobiaren argazki bat


Irudia: Berria / Les Bascos taldeko kideen prentsaurrekoa Baionan
Homofobiaren argazki bat.
Les Bascos elkartearen galdeketa batek dio erasoen laurdena ikastetxeetan gertatu direla. Botere publikoak sentsibilizazio eta prebentzio lanak indartzera bultzatu nahi dituzte.
Ekhi Erremundegi Beloki | Berria, 2019-05-14
https://www.berria.eus/paperekoa/1872/007/001/2019-05-14/homofobiaren-argazki-bat.htm

«Ipar Euskal Herrian ere homofobia errealitate bat da». Hala adierazi du Beñat Gachen Les Bascos elkarteko presidenteak, homofobiari buruz egin berri duten inkestaren emaitzak aurkeztu ondotik. Prebentzio eta sentsibilizazio kanpainak indartzeko beharra azpimarratu du LGTB taldeak, eta botere publikoei dei egin die tokiko elkarteei ahal gehiago eman diezaieten. Baionako eta Miarritzeko errugbi taldeekin eta LGTB komunitateko migranteekin lan berezi bat abiatzeko xedea ere erakutsi dute.

Orain dela lau urte Baionako Txalaparta egoitza ireki zutenetik, Les Bascos elkarteak 99 eraso homofoboren berri izan du; 12 eraso fisiko, eta 87 «eguneroko homofobia» kasu. Egoera hobeki neurtze aldera, joan den abenduan iragarri zuten inkesta bat abiatuko zutela. Urtarrilaren 7a eta martxoaren 15a artean, galdeketa bat zabaldu zuten sarean, eta 247 erantzun jaso dituzte. «Ezin dugu erran apaldu den ala emendatu den, ez baitugu bilakaera neurtzeko aitzineko urteetako daturik. Baina errealitate bat erakusten du, edo zati bat bederen», Gachenen hitzetan. Ondoko urteetan inkesta errepikatzeko asmoa erakutsi du.

Erantzun duten 247 pertsonen artean, erdiak diskriminazio homofobo baten lekuko izan dira; herenak, biktima. Eraso gehienak ahozkoak dira, baina, %8,4 eraso fisikora iristen dira. Zenbaki horiek izanik ere, erasoen %9 baizik ez dira salaketa batera heldu. «Salaketa ezartzeak homosexualitatea publikoki asumitzea erran nahi du batzuentzat, eta horrek frenatzen ditu. Baina biktimek ere jasotako erasoak banalitzatzen dituzte maiz».

Orokorrean, jaso dituzten eraso gehienak karrikan ala eremu publikoan gertatuak dira, baina deigarria da, ikertzaileen arabera, erasoen laurden bat ikastetxeetan gertatu direla. Beste ikerketa baten arabera, LGTB kolektiboko gazteen herenek ezinegona sentitzen dute eskolan. «Baimen ofiziala eskatu dugu ikastetxeetan prestakuntzak eman ahal izateko, baina oraingoz ez zaigu onartua izan».

Halaber, LGTB kolektiboko kideen laurdenak ez dira eroso sentitzen lanean. Berriki Chronoplus garraio enpresan izandako kasu bat atera zen argira. «Batzuek pentsa lezakete ez garela behartuak gure lanean homosexualak garela erratera, ez dugula zertan gure homosexualitatea kontatu. Baina ohartu behar duzue zuen eguneroko elkarrizketetan etengabe ari zaretela zuen heterosexualitatea kontatzen».

Iaz, gutun batean dei egin zioten Frantziako Gobernuari homofobiaren kontrako plan orokor bat diseina zezan. Besteak beste, justizia mailan eraso baten ezaugarri homofoboa hobeki kontuan hartzeko eskatu zuten: «Kolpeak jaso izana frogatu daiteke, baina biziki zaila da eraso bat arrazoi homofoboengatik gertatu dela erakustea», azaldu du Gachenek. Halaber, estatuko zerbitzuen prestakuntza hobetzeko eskatu zuten, eta sentsibilizazio kanpainak indartzeko ikastetxeetan.

Horren ondoan, Baionako suprefeturara, jendarmeriara eta komisariara ere idatzi zuten, bilkura bana eskatuz. «Sentsibilizazio lan bat egin behar genuela uste genuen, eta horregatik, komisarietan eta jendarmerietan borondate oneko harrera bermatzeko eskatu genien gutunean». Besteak beste, eskatu zuten halako erasoei begira prestakuntza lukeen pertsona erreferente bat izendatzeko, eta tokiko LGTB elkarteen informazioa emanen lukeen protokolo bat pentsatzeko. «Baionako komisarian biziki harrera baikorra izan dugu, eta hitzartu dugu guregana bideratuko dituztela eraso homofoboak salatzera joanen direnak». Suprefeturatik, haatik, ez diete erantzunik eman.

Galdeketaren emaitzak aztertuta, LGTB elkarteak hasierako proposamen batzuk ere formulatu nahi izan ditu. Hala, prebentzio eta sentsibilizazio lana indartzea nahiko lukete, eta beren elkartearen lana ezagutaraztea, laguntza behar duenak haiengana jo dezan. Botere publikoei ere dei egin diete, eta, besteak beste, Ipar Euskal Herriko homofobia aztertuko lukeen behatoki bat sortzea proposatu dute. «Ikerketa sakonagoak egin eta bilakaera aztertzeko aukera emanen liguke horrek».

Errugbia eta migranteak
Martxo bukaeran, polemika sortu zuen Baionako errugbi taldeko BOC jarraitzaile taldekoek sarean eskegitako bideo batek. Jean Baptiste Aldige Miarritzeko errugbi taldeko presidentearen kontrako irain homofoboak kantatzen ageri ziren. Les Bascos elkarteko kideek parada baliatu dute bi klubekin eta jarraitzaile taldearekin harremanean jartzeko, eta elkarlan bat proposatzeko. «Guztiek baikorki erantzun digute, eta aurtengo sasoia bukatzean elkartuko gara, heldu den ikasturtetik aitzina homofobiaren kontrako sentsibilizazio eta prebentzio kanpaina bat pentsatzeko».

Halaber, atzoko prentsaurrekoa baliatu zuten mundu osoan jazarriak diren LGTB komunitateko kideei babesa erakusteko ere. Etorkinekin kolektiboarekin elkarlanean, babesa ematen diete Ipar Euskal Herrira iristen diren LGTB migranteei. «Biziki konplikatua da haientzat, gehienetan ingurukoek eta familiek ez dutelako haien sexualitatearen berri. Aitortzea biziki arriskutsua izan daiteke haientzat». Iragarri dute ondoko asteetan Gehitu eta Aldarte elkarteekin batera ekintza komun bat eginen dutela.

No hay comentarios:

Publicar un comentario

Nota: solo los miembros de este blog pueden publicar comentarios.