#hemeroteka #lgtbi #unibertsitateak | Unibersidadearen inplikazinoa ezinbestekoa da LGBTI politiketan

Irudia: Ortzadar LGBT

Unibersidadearen inplikazinoa ezinbestekoa da LGBTI politiketan.
Unibersidadearen rola hurrengo belaunaldien formazinorako eta ikerkuntzearen sustapenerako giltza da.
Bizkaie!, 2018-11-30
https://bizkaie.biz/1543569821914

Bilbo izan da Ortzadar LGBT Alkarteak I LGBTI Bardintasunerako Topaketarako aukeratutako egoitzea, gaur itxiera ekitaldi eta ondorio saio batez zarratuko dana. Bizkaia Aretoan egindako lehen edizino honetan, ekitaldiaren asmoa familia dibersidadea, afektibo sexuala eta genero nortasunari jagokona Unibersidade esparruan lantzeko topagune bihurtzea izan da.

Inaugurazinoa Iñigo Lamarka Ararteko ohiak aurkeztu dau, eta Cristina Uriartek, Eusko Jaurlaritzako Hezkuntza Kontseilariak, Teresa Laespadak, Bizkaiko Foru Aldundiko Enplegu, Gizarte Inklusino eta Bardintasun Foru Diputaduak, Alberto Ruíz de Azúak, Bilboko Udaleko Bardintasun Zuzendariak eta Aratz Castrok, Ortzadar LGBT Alkarteko koordinatzaileak parte hartu dabe. Bestalde, Lide Amilibia, Eusko Jaurlaritzako Gizarte Politiketarako Sailburuordea, María Guijarro, Bizkaiko Foru Aldundiko Bardintasun Zuzendaria, Mireia Mata i Solsona, Kataluniako Generalitateko Bardintasun Zuzendaria eta Nerea Lupardo, Euskateleko Harreman Instituzionalen Zuzendaria be bertan izan dira.

Jardunaldian dozena batetik gora hizlari izan dira, guztira 60 gonbidadu baino gehiago. Unibersidadea izan da berbagai, formakuntzea eta ikerkuntzea sustatzeko helburuagaz; helburu nagusia bardinzale eta aniztasunagazko errespetuzko gizartea eregiteko beharrezko neurriak topetea izan dala, Unibersidadeak LGBTI bardintasunari jagokonean euki ahal eta behar dauen eginkizunean sakonduz.

Inaugurazino hitzaldia Miguel Lorentek, Gobernuko Genero Indarkeriaren ordezkari ohiak eta Granadako Unibersidadeko Bardintasun Unidadeko Zuzendariak emon dau; unibersidade esparruan dagoan dibersidadea azpimarratu dau, baita esparru honetan etorkizunean egin barik dagoan lana aitatu be.

Goizean zehar berbaldi batzuk be izan dira, Mireia Mata i Solsona, Kataluniako Generalitateko Bardintasun Zuzendaria, Ángel Pueyo, LGBT+ Errespetua, Aniztasuna eta Bardintasuna sustatzeko Zaragozako Unibersidadearen Plan Estrategikoaren talde teknikoko kidea, Teresa Ortega, Granadako Unibersidadeko Gizarte Erantzukizun, Bardintasun eta Inklusinoko Errektoreordea eta Elvia González del Pliego, Iberoamerikako Unibersidadeko Genero Pogramearen Koordinatzailearen eskutik.

Arratsaldeko barriketaldiotan, batetik Irakaskuntza eta Ikerketea zein Proiekzio Soziala gazterian gaiak landu ditue. Parte-hartzaileen artean Rakel del Frago, UPV/EHUko Bigarren Hezkuntzako Irakasleentzako Masterraren Zuzendaria edota Luis C. Capitán, Sevillako Unibersidadeko Medikuntza Fakultadeko Dekanoa izango dira.

Aratz Castro ekitaldiaren arduradunaren esanetan, ‘unibersidadearen rola hurrengo belaunaldien formazinorako eta ikerkuntzearen sustapenerako giltza da, baina oro har erreferente lez be hartu behar geunke’.

Topaketeak tarteko eragileen tokiko, estadu mailako eta nazinoarteko erakundeetako ordezkari ugariren babesa izan dau.

Bilbo-Bizkaia, gizarte barrikuntzan erreferentzia
Ugari izan dira Ortzadar LGBTren ekimenera batu bahi izan diran erakunde eta enpresak, aurrekari legez jokatzeko Bizkaia aukeratu dauen proiektu honetan. Azpimarratzekoak dira Eusko Jaurlaritzea, Bizkaiko Foru Aldundia, Bilboko Udala, Euskaltzaindia, Euskaltel edo Euskotren.

Aratz Castrok autortu dau Alkarteak Bilbo eta Bizkaia LGBTI Bardintasunerako politiketan lan egin nahi dabenentzako topagune bihur daitezen apostu egin dauela. Ganera, gobernu eta kalidade agentziek jarrera proaktiboa hartzearen garrantzia be azpimarratzen da, holan esparru instituzionalaren zein sozialaren tresneria guztia erabiliz.

Proiektua bultzatzen lagundu daben unibersidade autonomiko eta nazinoarteko guztiez gan, FELGTB, Lesbiana, Gay, Trans eta Bisexualen Estaduko Federazinoaren babesa be izan dau.

UNICEF erakundearen txostena
Bihar mundu zabalean nabarmenduko dogun HIES-aren egunaren harian, UNICEF erakundearen azken txostenaren arabera, 2030. urtean, egunean 80 nerabe hilko dira HIES-ak jota.

#hemeroteka #homofobia #zinea | Hassan Kamoga: 'Isilik geratzea ez da urtenbidea'

Irudia: Bizkaie! / Oneka Alvarez, Pau Guillen, Hassan Kamoga eta Marta Bermejo

Hassan Kamoga: 'Isilik geratzea ez da urtenbidea'.
Ugandan homosexualidadea debekatuta dago, baina Hassan Kamogak LGTB zinemaldia antolatu dau han. Zinegoak-en eskutik, Bilbon dago egunotan.
Dabi Piedra | Bizkaie!, 2017-02-22
http://bizkaie.biz/1487764987521

Homosexuala izateagaitik edo homosexualidadea bultzatzeagaitik, 14 urteko kartzelaldia ezartzen dabe Ugandako legeek. Traba eta ikara guztiei aurre eginda, baina, ekintzaile batzuek Queer Kampala jaialdia antolatu dabe, LGTB gaien inguruan herrialde horretan eratu dan lehenengoa. Lan hori txalotzeko, Zinegoak jaialdiak Sari Berezia emongo deutso Queer Kampalari barikuan.

Hassan Kamoga zinemagilea eta Queer Kampalako zuzendaria da. Berak hartuko dau Zinegoaken saria barikuan eta horregaz lotutako agerraldia egin dau Bilbon. Lehenik eta behin, eskerrak emon deutsaz Zinegoaki harrera beroagaitik. Ondoren, Queer Kampala antolatzea eta Ugandan homosexuala izatea zelako arriskutsua dan azaldu dau.

Pau Guillen Zinegoakeko zuzendariak egin deutso ondoetorria Hassan Kamogari. ‘Gure babesa emon nahi deutsagu, eta ez dagoala bakarrik esan’, dino Guillenek. Ganera, Bilbon erakutsi nahi izan dabe Queer Kampalakoen kasua, ahalduntzeko euren bizia arriskuan ipini dabe eta.

Barikuan hartuko dau Kamogak, Queer Kampalaren izenean, Sari Berezia. Ganera, eguenean, hilak 23, topagunea eta solasaldia antolatu dau Zinegoakek, Ugandako eta Afrikako egoerea aztertzeko. Kamoga bertan izango da.

Bilbon egindako agerraldian, Kamogak azaldu dau Queer Kampala ez dala jaio Ugandara begira, nazinoartea be kontuan hartzen dauela. Izan be, 70 herrialde ingurutan, homosexualidadea debekatuta dago. Ugandan bertan, homosexualei heriotza zigorra ezartzen eutsen legea kendu eben orain dala urte batzuk, baina presidenteak beste lege bat agindu eban, kolonialismoaren sasoietan oinarritutakoa: 14 urteko kartzelaldia homosexualidadeagaz zerikusia daukanarentzat.

Homosexualen kontrako jarrerea heziketa faltan eta ezezagutzan oinarrituta dagoala uste dau Hassan Kamogak. ‘Ugandan jenteak gitxi daki sexualidadearen ganean, uste dabe homosexualidadea Mendebaldetik etorritako moda bat baino ez dala’, dino Queer Kampalako zuzendariak. ‘Gure jaialdiaren helburuak kontzientziazinoa eta heziketea dira.’

Hassan Kamogak uste dau egoerea hobetzeko aletxua ipinten dabizala Queer Kampalan. ‘Modu asko dagoz gure eskubideak aldarrikatzeko, abogadua banintz epaitegietara joko neuke; zinemagilea nazenez, ba zinemea da nire erremintea’. Kamoga kontauta, zortzi laguneko lantaldea dago Queer Kampalaren atzean, beste hogei boluntario ingurugaz batera.

Hassan Kamogak dino, askok galdetzen deutsiela zergaitik antolatu daben Queer Kampala, euren bizia arriskuan jarten dabela jakinda. Kamogak argi eta garbi dauka: ‘Isilik geratuta be ez da ezer aldatuko’, isilik geratzea ez da urtenbidea. Ugandako LGTB komunidadearentzat, onena isilik ez geratzea dala uste dau. Bere kasuan, ganera, ikarea apaltzen laguntzen deutso, izan be, zeozer larria pasetan bajako, nazinoartean bere kasua ezagutuko da.

Ugandan homosexualidadea onartzea, eta zer esanik ez horren ganeko ekitaldiak antolatzea, oso arriskutsua danez, kontu handiz ibili dira Queer Kampalan. Gobernuak dirutzea kobrau nahi eutsien antolakuntzeagaitik eta, azkenean, baimen barik egin dabe aurrera. Poliziak zinemaldia non egingo zan galdetu eban, segurtasunagaitik, eta antolatzaileek okerreko lekuak esan zituen. Izan be, babestu baino, poliziak eurak jo eta atxilotzeko asmoa eukala susmau eben.

Jaialdia sekretupean antolatu zan ezkero, sare sozialen eta mezu elektronikoen bidez zabaldu eben hitzorduen barri. Konfiantzazko jentea baino ez eben onartu, badaezpada. Trabak gaindituta, hiru eguneko jaialdia izan zan Queer Kampala, 2016ko abenduan. Egunero leku baten izan ziran proiekzinoak, poliziaren begiradatik urrun.

Itzelezko arrakastea izan da, dino Hassan Kamogak. Guztira, 800 ikusle baino gehiago batu ziran Queer Kampalan. Jaialdiaren ezaugarri bereziak ezagututa, zenbaki ederra da hori. Orain, bigarren edizinoa antolatzen hasi dira, 2017ko abendurako, eta horretarako jentearen laguntzinoa eskatu dau Kamogak, Ugandakoa zein kanpokoa izan. Aholkuak, ideak zein dirua izan, bakotxak aportau leikeena pozarren hartuko dabe.

Esperantzea badauka Hassan Kamogak, Ugandan egoereak hobera egingo dauela homosexualentzat, horretarako denporea beharko dan arren. Hau ez da konponduko goizetik gauera. Ganera, jentearen burrukea ezinbestekoa izango dala dino. Nik ez dot ikusiko bidearen amaierea, baina oinarria jarri nahi dot.